რუსეთ-საქართველოს ეკონომიკური თანამშრომლობის განვითარების საკითხები განიხილეს რუსეთის სავაჭრო-სამრეწველო პალატასთან არსებულ რუსეთ-საქართველოს ბიზნეს საბჭოს წლევანდელი პირველი სხდომის ფარგლებში, რომელიც 6 თებერვალს გაიმართა.
სავაჭრო-სამრეწველო პალატის პრესსამსახურის ინფორმაციით, შეხვედრის მონაწილეებმა განსაკუთრებული ყურადღება გაამახვილეს ვაჭრობას, ტურისტულ კავშირებსა და ლოგისტიკას ორ ქვეყანას შორის. აღინიშნა, რომ სხდომის გახსნისას, რუსეთის სავაჭრო-სამრეწველო პალატის ვიცე-პრეზიდენტმა, ვლადიმირ პადალკომ, ხაზი გაუსვა რუსეთ-საქართველოს ბიზნეს საბჭოს აქტიურ საქმიანობას 76 მსგავსი გაერთიანების შორის, რომლებიც რუსეთის სავაჭრო-სამრეწველო პალატასთან მოქმედებს.
“2024 წლისთვის რუსეთის ბაზარი საქართველოსთვის უფრო მნიშვნელოვანი გახდა, ვიდრე ევროპული. გასული წლის მონაცემებით, ქვეყნებს შორის ორმხრივი ვაჭრობის მოცულობამ 2,5 მილიარდ დოლარს გადააჭარბა, ხოლო რუსეთი, თურქეთის შემდეგ, საქართველოს მეორე უმსხვილესი სავაჭრო პარტნიორი გახდა,” – განაცხადა სავაჭრო-სამრეწველო პალატის ვიცე-პრეზიდენტმა.
სხდომის მსვლელობისას, ვიცე-პრეზიდენტმა ასევე განსაკუთრებული ყურადღება გაამახვილა 2025 წლის იანვარში საქართველოსა და რუსეთის ბიზნეს ასოციაციის დაარსების საკითხზე.
აღინიშნა, რომ იანვრის ბოლოს ჩამოყალიბებულ ბიზნეს ასოციაციაში გაერთიანდება დაახლოებით 60 ბიზნეს სუბიექტი. თავად ორგანიზაცია დააარსა ბიზნესმენმა ზაზა ნიშნიანიძემ. მისი თქმით, ასოციაციით დაინტერესდნენ მევენახეები, ასევე აგროსექტორის სხვადასხვა წარმომადგენლები. ქართველ ბიზნესმენებს შორის ნიშნიანიძემ დაასახელა ბადრი კაკაბაძე, მარატ შაიდიევი, ლევან და თემურ ანჩაბაძე და ჯიმი ჩხაიძე, რომლებიც ბიზნეს საქმიანობას ეწევიან როგორც საქართველოში, ასევე რუსეთში.
“ასოციაციის მთავარი მიზანი იქნება იმ მეწარმეების დახმარება, რომლებიც პროდუქციას რუსეთში ექსპორტზე აყვანენ. საუბარია 600-700 ათასი ქართველი მოქალაქის ინტერესებზე,” – აღნიშნა პადალკომ.
მან ასევე შესთავაზა რუსეთ-საქართველოს ბიზნეს საბჭოსა და ახალ ასოციაციას შორის თანამშრომლობის განვითარება.
სხდომის მსვლელობისას, რუსეთ-საქართველოს ბიზნეს საბჭოს თავმჯდომარემ, იური ბალაშოვმა, წარადგინა 2024 წლის საქმიანობის ანგარიში და ისაუბრა სამომავლო ინიციატივებზე. კერძოდ, აღნიშნა, რომ 2025 წლის მაისში იგეგმება რუსეთ-საქართველოს ახალგაზრდული ფორუმის ჩატარება ინგუშეთში.
საბჭოს თავმჯდომარის მოადგილემ, დავით ცეცხლაძემ, ხაზი გაუსვა ქართველი და რუსი ხალხის ისტორიული კავშირების მნიშვნელობას და მეგობრული ურთიერთობების შემდგომი განმტკიცების საჭიროებას.
“ჩვენი საერთო ისტორია და მდიდარი კულტურული მემკვიდრეობა, რომელსაც ჩვენ ვამაყობთ და რომლითაც მომავალ თაობებსაც ექნებათ საამაყო, საშუალებას გვაძლევს შევინარჩუნოთ თბილი, ურთიერთპატივსაცემი და ნათესაური ურთიერთობები,” – განაცხადა ცეცხლაძემ.
სავაჭრო-სამრეწველო პალატის პრესსამსახურის ინფორმაციით, კიდევ ერთი საკვანძო საკითხი, რომელიც სხდომაზე განიხილეს, იყო საქართველოს სატრანზიტო პოტენციალი, რომელიც საკუთარ თავს “ევროპისა და აზიის გზაჯვარედინზე მდებარე სახელმწიფოდ” წარმოაჩენს. საქართველოსთან მოსაზღვრე რეგიონების წარმომადგენლებმა ისაუბრეს ლოგისტიკის მიმდინარე განვითარებაზე. ამ თემაზე ვიდეოკონფერენციის ფორმატში სიტყვით გამოვიდნენ ინგუშეთის სავაჭრო-სამრეწველო პალატის პრეზიდენტი რადმილა ნალგიევა, დაღესტნის სავაჭრო-სამრეწველო პალატის პრეზიდენტი ბადრუტინ მაგომედოვი და დაღესტნის ტრანსპორტის სამინისტროს მოადგილე მაგომედ ტაგიროვი.
“სხდომაზე განხილული იქნა რუსეთ-საქართველოს ურთიერთობებთან დაკავშირებული სხვა აქტუალური საკითხებიც. თანამშრომლობის გაძლიერების ინიციატივით გამოვიდნენ რუსეთის დამოუკიდებელი საცალო ქსელების კავშირის გენერალური დირექტორი, ივან ბაბუხაძე, და მეწარმე ვლადიმირ კლიმოვიჩი, რომელმაც საქართველოს ტერიტორიის გავლით საავტომობილო ტრანზიტის განვითარების პერსპექტივებზე ისაუბრა,” – აღნიშნულია განცხადებაში.
რუსეთ-საქართველოს ბიზნეს საბჭო რუსეთის სავაჭრო-სამრეწველო პალატასთან შეიქმნა 2023 წლის თებერვალში, როდესაც საბჭოს პირველი სხდომაც გაიმართა. საბჭოს მიზანია ახალი შესაძლებლობების შექმნა საქართველოსა და რუსეთს შორის ეკონომიკური ურთიერთობების გასაძლიერებლად და მეზობელი ქვეყნების მეწარმეების გაერთიანება.
საქართველოს სტატისტიკის ეროვნული სამსახურის (“საქსტატი”) მონაცემებით, 2024 წელს საქართველოსა და რუსეთს შორის სავაჭრო ბრუნვა 2023 წელთან შედარებით 5.4%-ით გაიზარდა, ხოლო ქართული პროდუქციის ექსპორტი რუსეთში – 3.7%-ით. გარდა ამისა, 2024 წელს რუსები საქართველოში ყველაზე დიდი რაოდენობით ტურისტულ ჯგუფს წარმოადგენდნენ – ქვეყანაში 1.4 მილიონზე მეტი ვიზიტი განახორციელეს, რაც 0.2%-ით მეტია, ვიდრე წინა წელს.
