Հունիսի 18-ին «Նարեկացի» արվեստի միությունում տեղի է ունեցել «Փոխենք աշխարհը`գունազարդելով այն» խորագրով լուսանկարների ցուցահանդեսը: Նախաձեռնության հեղինակը եղել է «Մենք կարող ենք» մտավոր խնդիրներ ունեցող երիտասարդների, երեխաների և նրանց ընտանիքների շահերի պաշտպանությամբ զբաղվող հասարակական կազմակերպությունը։
Ցուցահանդեսի լուսանկարների հեղինակները կազմակերպության ներառական խմբակի 11 անդամներն էին։ Նրանցից ամենաակտիվը Գոռ Ասատրյանն էր, ով ցուցահանդեսի ամեն մի դրվագ ֆիքսում էր իր ֆոտոխցիկում։
![](https://dlmn.info/wp-content/uploads/2018/06/IMG_2112.jpg)
Գոռի լուսանկարներում պատկերված են երեխաներ ու քաղաքային պատկերներ։ Գոռն ասաց, որ սիրում է քաղաքային նկարներ անել, սակայն ամեն ինչ կախված է թե այդ պահին ի՞նչ է ուզում նկարել։ Նա հավելեց, որ կոնկրետ ուղղություն չունի, նկարում է այն ամենը, ինչ մտքովն անցնում է։
Գոռի այս լուսանկարն իր ամենասիրելիներից մեկն է։ Լուսանկարը անելու գաղափարը շատ արագ է կայացրել։
«Դրսում ցուրտ էր ու ես էլ շտապում էի տուն գնալ, բայց այս երեխային տեսնելուց հետո հասկացա, որ շատ հետաքրքիր նկար կարող է ստացվել։ Երեխայի դեմքի արտահայտությունը շատ խոսուն էր, ես էլ փորձեցի նկարել ու կարծում եմ ստացվել է»,- պատմեց Գոռը։
Այս մեկն էլ նկարել է գարնանը՝ ցույցերի ժամանակ։ Նրա խոսքով այսլուսանկարը պատահական նկարների շարքից է։
«Ես չէի տեսել, որ մարդու ստվեր կա, միայն նկարելուց հետո տեսա, որ ստվեր կա։ Դա լուսանկարը արտահայտիչ ու դուրեկան դարձրեց»։
Ի դեպ, Գոռը լուսանկարչությամբ սկսել է զբաղվել 2 ամիս առաջ։ Ապագայում շարունակելու՞ է զբաղվել լուսանկարչությամբ, պատասխանեց՝ անպայման։
Ցուցահանդեսին ներկա էին նաև«Նարեկացի» արվեստի միության հիմնադիր Նարեկ Հարությունյանը ու Աշխատանքի և սոցիալական հարցերի նախարարի տեղակալ Զարուհի Բաթոյանը։ Նարեկ Հարությունյանը շնորհավորեց ապագա լուսանկարիչներին և նշեց, որ արվեստում սահմանափակումներ չկան, արվեստը ճախրում է։
«Դուք իբրև լուսանկարիչներ ունեք մեծ ուժ։ Դուք ձեր ձեռքին զենք ունեք, շատ ուժեղ, այդ զենքով մարդկանց հոգիների և մտքերի վրա եք ազդում։ Լուսանկարելուց չկշտանաք։ Լուսանկարիչը տեսնում է այն, ինչը չեն տեսնում մյուսները»,- նշեց Նարեկ Հարությունյանը։
![](https://dlmn.info/wp-content/uploads/2018/06/IMG_2146.jpg)
Զարուհի Բաթոյանն էլ դիմելով ցուցահանդեսին ներկա հյուրերին և լուսանկարների հեղինակներին, ասաց, որ լուսանկարները տպավորիչ են և եթե հետագայում ցուցահանդես-վաճառք լինի, ապա նա անպայման գնորդներից մեկը կլինի։
Այս լուսանկարների հեղինակն էլ Ռուզաննա Ղազարյանն է։ Նրա խոսքով դասընթացներին մասնակցելու նպատակը եղել է լուսանկարչության մասին ունեցած իր գիտելիքները հարստացնելը։
![](https://dlmn.info/wp-content/uploads/2018/06/IMG_2092.jpg)
«Նկարների միջոցով փոխանցել եմ այն, ինչ տեսել եմ։ Լուսանկարելու համար առանձնահատուկ բան պետք չէ, ուղղապի պետք է տեսնել»,- այսպես բնութագրեց լուսանկարչությունը Ռուզաննան։
Ցուցահանդեսի լուսանկարները՝ ստորև
Հեղինակ՝ Արփինե Բաղդասարյան