Մոսկվայում «Մեծ բեմ» փոփ երաժշտության՝ երիտասարդ երգիչների միջազգային հեռուստատեսային մրցույթի շրջանակներում օրերս տեղի ունեցավ Հայաստանի երիտասարդ տաղանդների, ինչպես նաև սփյուռքի հայրենակիցների իսկական շքերթ։ Մասնակիցների թվում, իսկ այս տարի նրանք 130-ից ավելի էին, մոտ տասը հայ երեխաներ կային։ Երկու երրորդ տեղեր զբաղեցրել են Հայաստանի ներկայացուցիչները՝ Նատալի Սաֆարյանը (8 տարեկան) և Վարդան Մարգարյանը (12 տարեկան)՝ հանդես գալով տարբեր տարիքային կատեգորիաներում։ Մրցույթում առանձնացավ նաև Մոսկվայից մեր հայրենակցուհին՝ 14-ամյա Էլեն Բադալյանը, ով շատերի կողմից սիրված է «Ձայն. Երեխաներ» հեռուստաշոուին մասնակցելուց հետո։ Հենց նա արժանիորեն ստացավ «Մեծ բեմ» մրցույթի Գրան պրին, ինչպես նաև իրավասու ժյուրիի հիացական գնահատականները:
Dalma News ինտերնետային պորտալն արդեն գրել է Էլենի մասին, երբ 2019 թվականին նա առաջին անգամ լուրջ հայտ ներկայացրեց մեծ բեմի՝ «Ձայն. Երեխաներ-6» հեռուստանախագծում ելույթի համար։ Այնտեղ 11-ամյա աղջիկը շահեց ինչպես ժյուրիի, այնպես էլ հեռուստադիտողների համակրանքը։ Սթիվի Ուանդերի «Don`t You Worry` Bout a Thing» ստեղծագործության նրա անթերի կատարումը գերեց Վալերի Մելաձեին, ով շրջվեց առաջին իսկ նոտաներից՝ բացականչելով. «Հիասքանչ է»: Գերազանց վոկալը անտարբեր չթողեց նախագծի ուսուցիչներին՝ Պելագեյային և Սվետլանա Լոբոդային, որոնք գովեստի խոսքեր էին հնչեցնում:
Ինչպես պարզվեց, անցնելով հեռուստաշոուի եզրափակիչ փուլ՝ Էլենը ամբողջ ընթացքում համառորեն գնում էր երաժշտական նոր բարձունքներ նվաճելու: Dalma News-ի հետ հարցազրույցում նրա մայրը՝ Մարինա Բադալյանը, պատմեց, որ 4 տարում (Էլենն իր ստեղծագործական ճանապարհը սկսել է 10 տարեկանում – խմբ.) հասցրել է մասնակցել առնվազն 10 տարբեր փառատոների, մրցույթների, հեռուստատեսային նախագծերի։ Օրինակ՝ անցյալ տարի ընտանիքի համար ամենահիշարժաններից էր աղջկա մասնակցությունը մանկական «Նոր ալիքին»։ Նախ այն պատճառով, որ այս նախագծում քասթինգն անցնելն ամենևին հեշտ չէ։
«Դահլիճի վերին շարքում նստած՝ ամուսինը հետևում էր Իգոր Կրուտոյին։ Լսումների ժամանակ նա ուշադրությամբ ինչ-որ բան էր կարդում հեռախոսով, իսկ երբ սկեց երգել Էլենը, Կրուտոյը կտրվեց հեռախոսից և նոթատետրում մեծ պլյուս դրեց։ Եվ մենք հասկացանք՝ մեր աղջիկը մրցույթի մասնակիցների թվում է»,- պատմում է Մարինան։
Մրցույթի նկարահանումները տեղի էին ունենում Հայաստանի համար դժվարին պահին՝ անցյալ տարվա աշնանը, Արցախյան պատերազմի ֆոնին։ Էլենի ընտրությունը, իսկ կատարում էր նա «Հայաստան» ստեղծագործությունը, հուզեց և՛ դահլիճում գտնվող հանդիսատեսին, և՛ էկրանից այն կողմ գտնվողներին։ Տաղանդավոր կատարողը գրավեց պատվավոր երրորդ տեղը!
Եվ ահա մեկ տարի անց բախտը կրկին ժպտաց երիտասարդ վոկալիստին. «Մեծ բեմ» մրցույթի գլխավոր հաղթողը որպես մրցանակ ստացավ 250 հազար ռուբլի, ինչպես նաև հրավեր՝ մասնակցելու Կրեմլում օգոստոսի 31-ին կայանալիք «Գիտելիքի օրը աստղերի հետ» տոնական համերգին։ Էլենը լրջորեն նախապատրաստվում է համերգին, որի և՛ հաղորդավարը, և՛ կատարողը լինելու է ինքը։ Այժմ պատրաստվում է կլորիկ գումար ծախսել մի մոդայիկ գաջեթի վրա՝ բջջային հեռախոս, որը նրան պետք է սեփական ստեղծագործությունների բարձրորակ տեսագրման համար։ Մոր խոսքով՝ Էլենը ստեղծագործում է, ինչպես ասում են՝ օր ու գիշեր. դստեր հեղինակային ժողովածուում արդեն կա մոտ 15 երգ, որոնցից երկուսը մշակված և պրոֆեսիոնալ ձայնագրված են ստուդիայում։
«Ինչ վերաբերում է «Մեծ բեմ» մրցույթին, ապա սկզբում այդքան էլ լուրջ չէինք վերաբերվում մեր մասնակցությանը այս մրցույթին։ Լրացրի հարցաթերթիկը, ուղարկեցի՝ իրականում հաջողության հույս չունենալով։ Սակայն պարզվեց, որ սա բավականին մասշտաբային մրցույթ է. երեխաները եկել են տարբեր երկրներից՝ Ղազախստանից, Մերձբալթիկայից, շատ մասնակիցներ կային Հայաստանից։ Ընդհանուր առմամբ, տարբեր տարիքային կատեգորիաներում մրցում էին շուրջ 130 երեխաներ։ Էլենն անցել է քասթինգը, 11-14 տարիքային կատեգորիայում հայտնվել է լավագույն տասնյակում, ապա դարձել եզրափակչի մասնակից։ Այն մասին, որ նա Գրան պրի է ստացել, իմացա արդեն գալա համերգի ձայնագրման ժամանակ։ Կազմակերպիչները զանգահարեցին ինձ և խնդրեցին Էլենին հեռացնել կուլիսներից, որպեսզի նա չկռահի իրեն սպասվող անակնկալի մասին։ Սակայն անել դա առանց հիմնավորման այդպես էլ չհաջողվեց, ստիպված եղա բացել քարտերը, նախքան նրան բեմ կհրավիրեին մրցանակի հանձնման համար: Դա իսկական ցնցում էր և բուռն բերկրանք. և՛ ես, և՛ աղջիկս անչափ երջանիկ էինք՝ բառիս բուն իմաստով ցատկոտում էինք Vegas City Hall-ի միջանցքում: Ի վերջո, մենք լավ գիտենք, թե ինչ է նշանակում մեծ բեմ դուրս գալ բացառապես սեփական ուժերով: Ուստի, անչափ շնորհակալ ենք հեղինակավոր ժյուրիին, որն այդքան արդար է մոտեցել իրենց ընտրությանը»,- պատմում է Մարինա Բադալյանը։
Ժյուրին շատ ներկայացուցչական էր՝ Էթերի Բերիաշվիլի, Դիանա Գուրցկայա, «Նոր ալիք-2021»-ի հաղթող Սարո Գևորգյան, «Մեծ բեմ» մրցույթի հիմնադիր Յուրի Գոնչար։ Իսկ նախագահում էր ժյուրին հենց ինքը՝ Դեյվիդ Լի Բրյուերը՝ աշխարհահռչակ վոկալի ուսուցիչ, Բիյոնսեի առաջին ուսուցիչը։ Այնպես զուգադիպեց, որ Էլենը որպես մրցութային առաջին օրվա կոմպոզիցիա ընտրեց Բիյոնսեի «Listen» երգը։ Սակայն ռիսկն արդարացված էր՝ աղջկա հասցեին բազմաթիվ բացականչություններ էին լսվում, և Բրյուերը ելույթի ժամանակ ակտիվորեն երգում էր նրա հետ։ Արդեն կուլիսների հետևում պրոֆեսիոնալը բազմաթիվ հաճոյախոսություններ է արել երիտասարդ երգչուհուն՝ նշելով կատարողական ոճի անհավանական մելիզմատիկությունը։
Հեռուստաշոուի ձայնագրությունը շուտով կցուցադրվի «Մուզ-ՏՎ» հեռուստաալիքով։ Այդ ընթացքում Էլենը պատրաստվում է նվաճել հերթական երաժշտական բարձունքը։ Հեռուստանախագծի ընթացքում նա առաջարկ է ստացել մասնակցել ամանորյա մյուզիքլին։ Օրերս կայացավ քասթինգը, և Էլենը դերասանների հիմնական ցուցակում էր։ Միաժամանակ նա աշխատում է սեփական երգի ձայնագրման վրա. այն գործիքավորելու և «Մանկական ռադիո»-ի եթերում դրա ռոտացիայի իրավունքը տրամադրել է «Sony Music»-ը։
Բացի այդ, արդեն երկրորդ տարին է, վոկալիստը անհամբերությամբ սպասում է Իգոր Կրուտոյի ակադեմիայի «Բիտվա տալանտով» նախագծի շարունակությանը (ամերիկյան «Golden Talent» շոուի անալոգ), որը մեկնարկել է 2020 թվականի մարտին, սակայն սառեցվել է Covid-19-ի համաճարակի պատճառով։ Այստեղ Էլենը «ոսկե կոճակ» ստացավ և անմիջապես անցավ կիսաեզրափակիչ։ Սակայն ավելի ուշ նախագիծը չեղարկվեց և սկսվեց նորովի։ Այնուամենայնիվ, աղջիկը անցել է քասթինգը և անհամբերությամբ սպասում է նկարահանումների մեկնարկին։
Էլենը 14 տարեկանում արդեն մասնակցել է գրեթե բոլոր հեղինակավոր մրցույթներին։ «Ուրիշ ինչի՞ մասին երազել», – հարցնում ենք նրան: «Նույնիսկ չգիտեմ։ Գուցե Եվրատեսիլը «նվաճեմ»,- ժպտալով պատասխանում է նա։ Հաջորդ տարի Հայաստանը ներկայացված կլինի այս մրցույթում, և զրուցակիցը չի բացառում, որ կարող է իր ուժերը փորձել շոուի մանկական տարբերակի ընտրության ժամանակ։
Ինչ վերաբերում է ավելի մեծ ծրագրերին, ապա, ըստ Էլենի, պատասխանը միանշանակ է՝ անպայման պատրաստվելու է մեծահասակների մրցույթներին՝ «Եվրատեսիլ»-ին ու «Նոր ալիք»-ին։ «Իհարկե: Շատ կցանկանայի փորձել ինքս ինձ», – ոգևորված ասում է նա: Դե, իսկ մայրս՝ Մարինա Բադալյանը, նշում է, որ դեռ 4 տարի կա, և այժմ պետք է մտածել ոչ միայն մրցույթների, այլ նաև ուսման մասին»։
Երիտասարդ երգչուհու ծրագրերում է Գնեսինների անվան երաժշտական ուսումնարան (ջազ-էստրադային վոկալի ֆակուլտետ) ընդունվելը: Դե, իսկ մրցույթները, ինչպես ասում են, կհետևեն։ Մեր երիտասարդ հայրենակցուհուն մաղթում ենք միայն հաղթանակներ։ Իսկ մեզ մնում է հաճույք ստանալ Էլենի հետագա ձեռքբերումներից և իրեն բնորոշ հոգեթով, խորաթափանց նոր ստեղծագործություններից:
Իրինա Գրիգորյան
