ცოტა ხნის წინ, ინდოეთში ტრადიციად ქცეული, რიგით მესამე კინოფესტივალი “Indywood Film Carnival” გაიმართა, რომელიც ბოლო წლებში ინდური და მსოფლიო კინოინდუსტრიის წარმომადგენლებს აერთიანებს. ღონისძიების დროს დაჯილდოვების ცერემონიალიც შედგა და ნომინაციაში “კინოტურიზმი” დასახელდა საქართველო, რომელიც აღიარეს წლის საუკეთესო ქვეყნად,სადაც შესაძლებელია უცხოური ფილმების გადაღება. საქართველოს კინემატოგრაფიის ეროვნული ცენტრის ინფორმაციით, საქართველოს ელჩს ინდოეთში, არჩილ ძულიაშვილს, რომელიც აღნიშნულ ღონისძიებაზე საკუთარ ქვეყანას წარმოადგენდა, სპეციალური სელტიფიკატი გადაეცა.
საქართველო ინდური კინოწარმოებისთვის მნიშვნელოვან ლოკაციად იქცა. უკვე ერთი წელია, ბოლივუდელი რეჟისორები და პროდიუსერები, აქტიურად ინტერესდებიან საქართველოს ლანდშაფტით და ერთგვარი მრავალფეროვნება შეაქვთ თავიანთ, ისედაც მრავალფეროვან კინოპროდუქციაში. 7 საერთაშორისო პროექტიდან, რამდენიმე ინდური ფილმის სრული, თუ ნაწილობრივი გადაღებები საქართველოს სხვადასხვა კუთხეში მიმდინარეობდა. ფილმების – “Machine”, “Gautamiputra Satakarni”, “პსვ გარუდა ვეგა”, “SONU KE TITU KI SWEETY”-ს მწარმოებელი ქვეყნებია საქართველო – ინდოეთი. ხოლო ფილმის “My Happy Family” მწარმოებელი არის საქართველო.
კომედიური ჟანრის ინდური ფილმის – “SONU KE TITU KI SWEETY”, გადაღებები თბილისში ზაფხულის ცხელ დღეებში დაიგეგმა. ქალაქის ძველი ქუჩები, კიდევ ერთ ინდურ ფილმში აღიბეჭდა. რამდენიმე ეპიზოდი დავით აღმაშენებელის ახლად რეაბილიტირებულ გამზირზე გადაიღეს.
როგორც ქართველი პროდიუსერები აცხადებენ, ტექნიკურად ძალიან გამართული ჯგუფია, საკმაოდ მომზადებულები ჩამოვიდნენ და ქართველი კოლეგებისგანაც პროფესიონალური დახმარება მიიღეს. რაც მთავარია მუშაობით კმაყოფილები არიან და მომავალშიც გეგმავენ თანამშრომლობას.
ინდოელი კინომწარმოებლებისთვის მთელი საქართველო საინტერესო და მიმზიდველი ლოკაციაა. ბოლივუდისთვის მომხიბვლელია, როგორც ზღვა, ასევე, მთიანი რეგიონები. ბათუმი, მესტია, ყაზბეგი, რუსთავი და თბილისი, – ეს ის ძირითადი ადგილებია, სადაც ცნობილი ძმები, აბას და მუსტან ბურმავალები, ინდურ რომანტიკულ ტრილერ “ავტომობილს” (“Machine”) 65 დღის განმავლობაში იღებდნენ. ეს ერთ-ერთი პირველი მასშტაბური პროექტია, რომელიც საქართველოში განხორციელდა და ქვეყნის თითქმის ყველა რეგიონი მოიცვა. რამდენიმე დღით გადასაღებ მოედნად იქცა თბილისის სახელმწიფო უნივერსიტეტის პირველ კორპუსი, იპოდრომი და მუხათგვერდის სასაფლაოც კი. ეს პირველი ინდური ფილმია, რომლის ყველა სცენა საქართველოშია გადაღებული, მათ შორის ისეთებიც, სადაც ფილმის სცენარის მიხედვით მოქმედება ინდოეთში ხდება.
“Machine” რომანტიკული თრილერია, რომელიც ოთხი სტუდენტის დაძაბული ურთიერთობების შესახებ მოგვითხრობს. ფილმში მოხვდა საქართვლოს კულტურული მემკვიდრეობის ძეგლები. მათ შორის გერგეთის სამება. ფილმის მუსიკალურ და ქორეოგრაფიულ ნომრებში ქართველი მსახიობები და მოცეკვავეებიც მონაწილეობენ. სცენარის მიხედვით, ერთ-ერთი პერსონაჟი იღუპება და საჭირო იყო სცენის სასაფლაოზე გადაღება, რისთვისაც მუხათგვერდის სასაფლაო შეირჩა.
გადაიღე საქართველოში…
პროგრამა “გადაიღე საქართველოში”- ეკონომიკის სამინისტროს სააგენტოს “აწარმოე საქართველოში” პროექტია. მისი მიზანია, საქართველო აღმოსავლეთ ევროპაში მიმზიდველ გადასაღებ ცენტრად იქცეს და მალე საერთაშორისო მასშტაბით დიდ კინომწარმოებლებს უმასპინძლოს. გარდა ამისა, მოქმედებს ერთი ფანჯრის პრინციპი, რაც უცხოელებს მთელი რიგი ადმინისტრაციული საკითხების მოგვარებას უადვილებს. პროექტის ფარგლებში მოქმედებს ე.წ. ქეშ რიბეითის სქემა. ეს არის ნაღდი ფულის უკან დაბრუნების სისტემა. კერძოდ, ფილმის წარმოების ხარჯებიდან შესაძლოა, გამოიყოს კვალიფიციური ხარჯი, რომლის 20% – 25% ფილმის მწარმოებელ კომპანიას უკან დაუბრუნდება. ქეშ რიბეითი პროგრამის – “გადაიღე საქართველოში”, შემადგენელი ნაწილია, რომელსაც მეწარმეობის განვითარების სააგენტო ეროვნულ კინოცენტრთან თანამშრომლობით ახორციელებს.
როგორც სააგენტოში აცხადებენ, მიუხედავად იმისა, რომ პროგრამა 2016 წელს დაიწყო, უკვე განხორციელდა 7 პროექტი და 9 მილიონ ლარამდე მოცულობის ინვესტიცია, შეიქმნა 700-მდე ახალი სამუშაო ადგილი. დასაქმებულთა შორის არიან მსახიობები და სხვა ტექნიკური მიმართულებით ჩართული პირები.
“ბოლივუდის კინემატოგრაფია კი, თავისი სპეციფიკით გამოირჩევა. წლის განმავლობაში დიდი რაოდენობით პროდუქტს ქმნიან. პროექტს პოზიტიური ეფექტი აქვს ინვესტიციების მოზიდვის თვალსაზრისითაც. გარდა ამისა, კომუნიკაცია გვაქვს ყველა წამყვან კინო მწარმოებელ ქვეყანასთან და გვსურს საქართველო იქცეს საერთაშორისო კინოწარმოებისთვის მნიშვნელოვან ლოკაციად”, – აცხადებს “აწარმოე საქართველოს” მეწარმეობის ხელშეწყობის დეპარტამენტის უფროსი ოთარ ანთია.
მისივე თქმით, საქართველოს ლანდშაფტი საშუალებას იძლევა, ფილმის გადამღები ჯგუფი თვისობრივად განსხვავებულ გადასაღებ ლოკაციებზე, დროის მცირე მონაკვეთში და მცირე დანახარჯით გადაადგილდეს. ზღვის ნაპირებიდან მთაში, ან უდაბნოში, სრულიად განსხვავებულ გარემოში აღმოჩნდნენ.
როგორ იწყება თანამშრომლობა…
პროგრამა “გადაიღე საქართველოში” ფარგლებში ე.წ Cash rebate მექანიზმით სარგებლობისა და პროგრამაში ჩართვისთვის ვებგვერდის www.filmingeorgia.ge მეშვეობით დაინტერესებული პირი ავსებს განაცხადს, სადაც წარმოადგენს სათანადო დოკუმენტაციას (მათ შორის ფილმის სინოპსისი), რომლის საფუძველზეც განისაზღვრება პროექტის პროგრამის კრიტერიუმებთან თავსებადობა.
მრავალფეროვანია პროგრამის ფარგლებში გადაღებული ფილმების ჟანრებიც. დრამა, კომედია, საბრძოლო, რომანტიკული ტრილერი – ეს ის ჟანრებია, რაც ამ ეტაპისთვის უკვე გადაიღეს საქართველოში. თუმცა, ეკონომიკის სამინისტროში ამით არ კმაყოფილდებიან და პერმანენტულ რეჟიმში აწარმოებენ მოლაპარაკებებს სხვადასხვა უცხოელ კინომწარმოებლებთან. ინდოელების გარდა, მწარმოებელ ქვეყნებს შორის არიან ნორვეგია, აშშ, საფრანგეთი, იტალია და გერმანია.
“მოლაპარაკებები საკმაოდ აქტიურად მიმდინარეობს ევროპისა და ამერიკის მასშტაბით, შედეგიც შესაბამისია და სამომავლოდაც საკმაოდ პოზიტიური მოლოდინები გვაქვს”, – განუცხადეს Dalma News-ს მეწარმეობის ხელშეწყობის დეპარტამენტში.
პროგრამა “გადაიღე საქართველოში”, უცხოელი კინომწარმოებლებს, მაქსიმალური კომფორტის შესაქმნელად ტექნიკური ჯგუფის დახმარებასაც სთავაზობს. საჭიროების შემთხვევაში აქტიურად თანამშრომლობენ გადასაღებ მოედანზეც და მოსამზადებელი სამუშაოების პროცესშიც. თითოეული ფილმის შემდეგ გრძელდება კომუნიკაცია და სამომავლო თანამშრომლობის პერსპექტივებს სახავენ.
რა თქმა უნდა, ფილმის სათანადოდ წარმოჩენა და გავრცელება უშუალო კავშირშია საქართველოს პოპულარიზაციასა და ქვეყნის სახელთან, ამდენად საქართველოში გადაღებული წარმატებული ფილმი პროგრამის წარმატების პირდაპირპროპორციულია.
“საქართველოში გადაღებულმა რამდენიმე ინდურმა ფილმმა საკმაო ყურადღება დაიმსახურა საერთაშორისო ბაზარზე. მაგალითად, ფილმმა “ჩემი ბედნიერი ოჯახი”, სხვადასხვა ფესტივალებსა თუ ჩვენებებზე მრავალი ჯილდო მოიპოვა. ამასთანავე, აღნიშნული ფილმი მსოფლიოში ერთ-ერთმა უდიდესმა ინტერნეტ ტელევიზიის ქსელმა – “Netflix” შეიძინა”, – განუცხადეს Dalma News-ს “აწარმოე საქართველოს” საზოგადოებასთან ურთიერთობის სამსახურში.
მათივე ინფორმაციით, ინდური ფილმების გადაღების პროცესში ჩართული იყვნენ ქართველი მსახიობები, მათ შორის მთავარ როლებზეც. ინდური და ბერძნული საბრძოლო ხელოვნების ამსახველ ფილმ “Gautamiputra Satakarni”-ში ერთ-ერთ მთავარ როლს ქართველი მსახიობი ასრულებდა, რომელსაც გადაღებების ადგილობრივად დასასრულებლად ინდოეთში გამგზავრებაც კი მოუხდა.
გეტყვით იმასაც, რომ პროგრამის ფარგლებში 20-25%-მდე თანხის ანაზღაურების მექანიზმი მოიცავს ე.წ. “კულტურულ ტესტს”, რომლის გავლის შემთხვევაში ავტომატური 20%-ის ანაზღაურებას ემატება 5%, რაც თავის მხრივ, რამდენიმე კრიტერიუმისგან შედგება და მოიცავს წამყვან პოზიციებზე ადგილობრივი პერსონალის დასაქმებას, მათ შორის მსახიობების და რეჟისორების, ასევე ქართული ელემენტების წარმოჩენას, რაც ერთგვარი სტიმულია არა მხოლოდ უცხოელი კინომწარმოებლისთვის, გამოიყენოს ადგილობრივი რესურსი, არამედ ადგილობრივი სპეციალისტებისთვისაც, რომლებიც არ არიან განებივრებულნი ფილმების ხშირი გადაღებით.
P.S. კიდევ ერთი დეტალი. საქართველოში გადაღებული ინდური ფილმების ქართველი მაყურებლისთვის სპეციალური ჩვენებების მოწყობას, ან მათი რომელიმე ტელეარხის ეთერით გაშვებას, პროგრამა “გადაიღე საქართველოში” არ ითვალისწინებს. ასე, რომ ქართველ მაყურებელს ისღა რჩება, ნაცად ხერხს მიმართოს და ინტერნეტსივრცეში მოიძიოს მისთვის სასურველი ფილმი. უფრო სწორად ის ფილმები, რომლებშიც საქართველოს სხვადასხვა ღირშესანიშნაობებია წარმოჩენილი და თუ ფილმის სიუჟეტის მიმართ განსაკუთრებული ინტერესის გამო არა, მშობლიური ლანდშაფტის უცხო რაკურსით ხილვის ინტერესის გამო მაინც ნახოს 7 ფილმიდან ერთ-ერთი. მაშინ, როდესაც ქართული ტელეარხების საეთერო დრო უხვად ეთმობა ინდურ სერიალებს, ვგონებ არც ქართულ სინამდვილეში გადაღებული, ამ რამდენიმე ინდური ფილმის ჩვენება უნდა წარმოადგენდეს პრობლემას.
შ. ქარჩავა
