Հայաստանում մեկնարկել է Ռուսական տան («Ռոսսոտրուդնիչեստվո») Կամավորների դպրոցի երկրորդ հոսքը, որը յուրահատուկ հարթակ է նրանց համար, ովքեր ոչ միայն ցանկանում են կամավորական աշխատանք կատարել, այլև ունեն տարրական գիտելիքներ ամենաարդիական խնդիրների վերաբերյալ։
Դպրոցի շրջանակներում տեսական և գործնական պարապմունքներ են անցկացնում բարձր որակավորում ունեցող փորձագետները։ Նրանցից շատերը մեծ փորձ և գիտելիքներ ունեն, ինչը միանշանակ օգտակար կլինի ծրագրի մասնակիցների համար:
Ինչպես Dalma News -ի հետ հարցազրույցում նշեց Երևանում Ռուսական տան գիտական, կրթական և երիտասարդական ծրագրերի համակարգողի օգնական Դիանա Բադալյանը, դեռ 2022 թվականի սկզբին գործընկերների հետ միասին հասկացան, թե որքան կարևոր է կամավորական շարժման տարածումը երիտասարդների շրջանում և ոչ միայն: Նշենք, որ պարապմունքներին հաճույքով են հաճախում անգամ տարիքով մեծ ունկնդիրները։
Այս նախագիծը բավականին երկար ժամանակ մշակման փուլում էր, քանի որ աշխատանքներ էին տարվում հատուկ ծրագրի ստեղծման ուղղությամբ. որոշվեց ուսումնական գործընթացում ներառել գործնական պարապմունքներ, որոնք ապագայում անշուշտ օգտակար կլինեն սովորողների համար։ Այսպիսով, 2022 թվականի հոկտեմբերի 25-ին Երևանում Ռուսաստանի գիտության և մշակույթի կենտրոնում բացվեց Կամավորների առաջին դպրոցը։ Արդյունքից գոհ էին ոչ միայն կազմակերպիչները, այլև ունկնդիրները, ուստի երեք ամիս անց նույն վայրում նոր ունկնդիրներ էին հավաքվել։
«Ռոսսոտրուդնիչեստվո»-ի ղեկավարի տեղակալ Դմիտրի Պոլիկանովը իր տեսաուղերձում ողջունեց Կամավորների դպրոցի երկրորդ հոսքը՝ մաղթելով բոլորին «վարակվել շատ ճիշտ վարակով՝ բարեգործության վարակով, կամավորության վարակով, ինչը կօգնի կարևոր զգալ և գիտակցել սեփական կյանքի նպատակները…»:
Հայաստանում «Ռոսսոտրուդնիչեստվո»-ի ներկայացուցչության փոխղեկավար Վիկտորյա Դերիպասկոն խոսեց մեր օրերում կամավորության կարևորության մասին և բոլորին հաջողություն մաղթեց կամավորական աշխատանքում։
Ամսվա ընթացքում հատուկ հրավիրված բանախոսները պարապմունքներ և վարպետության դասեր կանցկացնեն հետևյալ առարկաներից՝ թիմի կառուցում, հոգեբանություն, մեդիագրագիտություն, հռետորաբանություն, ընդհանուր գիտելիքներ կամավորության մասին, առաջին բժշկական օգնություն, կամավորական կազմակերպությունների և միությունների ստեղծման և կառավարման տեխնոլոգիաներ: Երկրորդ հոսքի վերջում ունկնդիրները կներկայացնեն իրենց կամավորական նախագծերը։
«Ցանկանում եմ նշել, որ անձամբ ինձ համար կարևոր է կամավորությունը: Ինքս երկար տարիներ զբաղվել եմ կամավորական աշխատանքով, հանդես եմ եկել որպես խոշոր միջոցառումների կազմակերպիչ», – Dalma News -ի հետ հարցազրույցում նշել է Դիանա Բադալյանը։
Դպրոցի երկու հոսքերի միջև տարբերություն կա՝ փոխվել է տարիքային կատեգորիան: Իհարկե, չի կարելի չուրախացնել, որ նախագծի նկատմամբ հետաքրքրություն են ցուցաբերում ոչ միայն դեռահասները, այլև մեծահասակները։ Ոմանք գալիս են ծնողների ու հարազատների հետ։ Դահլիճում կան նաև առաջին հոսքի մասնակիցներ, ովքեր այնքան էին տարված այս թեմատիկայով, որ որոշել են շարունակել ընդլայնել իրենց գիտելիքներն այս ոլորտում։
«Վստահաբար կարելի է ասել, որ արդյունք արդեն կա։ Նախ այն, որ երկրորդ հոսքի բացումն արդեն տեղի է ունեցել։ Երկրորդ՝ այնքան հետաքրքրված մարդիկ կան՝ վառ ու նոր գաղափարներով ու նախագծերով։ Կարծում եմ՝ սա լավագույն արդյունքն է», – հավելեց Բադալյանը։
Դպրոցի շրջանակներում արդեն մի քանի դաս է անցկացվել։ Օրինակ, Շահանե Մկրտչյանը, ով կոնֆլիկտների լուծման դասընթացների և տրավմաների հետ աշխատելու թրեյնինգների հավաստագրված մասնակից է, խոսեց այն մասին, թե ինչպես կարող է կամավորը սթրեսակայուն դառնալ։
։ Շահանեն վստահեցնում է, որ շատ կարևոր է դպրոցի մասնակիցներին փոխանցել նման բովանդակություն, քանի որ այն ազդում է երիտասարդների գիտակցության և, համապատասխանաբար, երկրի ապագայի վրա։ Եթե առաջին հոսքի ժամանակ հիմնականում ներկայացվում էր տեսական մասը, ապա այժմ պրակտիկան ավելի շատ է։ Դասախոսության ընթացքում Շահանե Մկրտչյանը օրինակով ցույց տվեց, թե ինչպես կարելի է մի քանի րոպեում հանգստանալ շնչառության օգնությամբ։ Ունկնդիրները բանախոսի հետ միասին կատարեցին վարժությունները։
«Թեմաների ընտրության պատճառ է հանդիսացել արդիականության գործոնը։ Ստացված տեղեկատվությունը թե՛ այժմ, թե՛ ապագայում խիստ անհրաժեշտ կլինի ունկնդիրներին։ Բոլորս ամեն օր առնչվում ենք սթրեսի հետ: Իմ խնդիրն է բացատրել, թե ինչ է սթրեսը և ինչպես աշխատել դրա հետ: Փորձեցի հասնել նրան, որ դասախոսությունների վերջում ունկնդիրները հոգեբանորեն ավելի գրագետ դառնան», – նշեց Շահանեն:
Մեդիափորձագետ Հայկ Դերզյանն իր հերթին խոսեց հասարակական կազմակերպություն ստեղծելու հիմունքների մասին և սեփական կոնտենտն ու ծառայությունները տարբեր սոցիալական հարթակներում առաջ մղելու մասին։ Նա անդրադարձավ նաև մեդիագրագիտության թեմային՝ ինչպես տարբերել իրական լուրերը կեղծ լուրերից, որքան կարևոր է գտնել սկզբնաղբյուրը, գրավել մարդկանց ուշադրությունը սոցիալական ցանցերում վառ բովանդակության միջոցով և ճիշտ գովազդել ծառայությունները։
Դպրոցի կազմակերպիչները վստահեցնում են, որ ծրագրի մասնակիցներին շատ ավելի հետաքրքիր դասախոսություններ են սպասվում տարբեր թեմաներով։
Պատրաստեց Դիանա Կարոնինան
