Երևանում մամուլի ասուլիս է տեղի ունեցել Հայաստանում ՌԴ դեսպան Սերգեյ Կոպիրկինի հետ։ Համաժողովը նվիրված էր Ռուսաստանի և Հայաստանի միջև դիվանագիտական հարաբերությունների հաստատման 30-ամյակին։ Միջոցառմանը մասնակցում էին ռուսական և հայկական ԶԼՄ-ների ներկայացուցիչներ։
Հայաստանում ռուսաց լեզուն երկար տարիներ պարտադիր առարկա է եղել բոլոր դպրոցականների համար՝ սկսած երկրորդ դասարանից։ Այնուամենայնիվ, վտանգ կա, որ ռուսերենը մեր երկրում կարող է իր առաջատար դիրքը զիջել անգլերենին, որն ավելի պահանջված է համաշխարհային ասպարեզում, խոստովանել է Հայաստանում ՌԴ դեսպան Սերգեյ Կոպիրկինը։
Հայաստանի երիտասարդ սերունդը ակնածանքով է վերաբերվում Ռուսաստանի ու Հայաստանի ընդհանուր պատմական հիշողությանը և սերունդների շարունակականությանը։ Առանձնահատուկ ուշադրություն է դարձվում ռուսաց լեզվին ու ռուս գրականությանը։ Այս պահին դպրոցներում ռուսաց լեզվի ուսուցումը սկսվում է երկրորդ դասարանից, սակայն շատ երեխաներ դպրոց ընդունվելիս արդեն տիրապետում են խոսակցական ռուսերենի տարրական մակարդակին։ Բարձրագույն կրթությունը նույնպես առանձնահատուկ ուշադրության է արժանանում, քանի որ մեծ թվով հայ դիմորդներ ձգտում են ընդունվել ռուսական բուհեր։ Այս տարվա համար հատկացվել է կրթական շուրջ 250 քվոտա, հետագայում այս թվի զգալի մեծացում է դիտարկվում։
Հայաստանում Ռուսաստանի դեսպանությունը «Ռոսսոտրուդնիչեստվո»-ի ներկայացուցչության աջակցությամբ բազմաթիվ կրթական ծրագրեր է իրականացնում։ Կանոնավոր կերպով իրականցվում է հանրակրթական ձեռնարկների տրամադրում սահմանամերձ համայնքների դպրոցներին, իրականացվում է «Հայաստանում Ռուսաստանի հոգևոր մշակույթի օրեր» նախագիծը, դիմորդները պատրաստվում են միասնական պետական քննություն հանձնելու («Ռոսսոտրուդնիչեստվո»-ում ռուսական մշակույթի և գիտության կենտրոնում), ինչպես նաև անցկացվում են դասընթացներ՝ զարգացնելու ռուսաց լեզվի մշակույթի պատմական արժեքները։
«Ռուսաստանը մեծ ուշադրություն է դարձնում Հայաստանի հեռավոր շրջաններին: Ընդգծում ենք «Ռոսսոտրուդնիչեստվո»-ի գործունեությունը, որը հսկայական աշխատանք է կատարում մարզերի զարգացմանը նպաստելու համար։ Այժմ ակտիվորեն քննարկվում է չորս ռուսալեզու դպրոցների կառուցման հարցը: Այս նախագիծը կարող է համակարգաստեղծ դառնալ քաղաքական ամենաբարձր մակարդակով: Այժմ Հայաստանում մեծացել է ՌԴ քաղաքացիների հոսքը, և, համապատասխանաբար, ռուսաց լեզուն սովորելու անհրաժեշտությունն ավելի է մեծացել», – ասում է Սերգեյ Կոպիրկինը։
Ռուսաստանի և Հայաստանի միջև հումանիտար համագործակցությունը թույլ է տալիս երկու երկրներին կիրառել տարբեր ոլորտներից ստացված փորձը: Դեսպանի խոսքով, հումանիտար գործընկերության ոլորտում հիմնական խնդիրը ռուսաց լեզվի ուսուցման խթանումն է, ինչպես նաև կրթության ոլորտում երիտասարդական նախաձեռնություններին աջակցությունը։
